Arnarlax ehf. hefur keypt allt hlutafé Bæjarvíkur ehf. sem rekur fiskeldisstöð á Gileyri í Tálknafirði.

Arnarlax er að hefja laxeldi í Arnarfirði og hefur nú þegar fengið öll tilskilin leyfi til þess. Kaupin á Bæjarvík er fyrsta skrefið í uppbyggingu sem framundan er hjá fyrirtækinu. Áform Arnarlax er að halda áfram þeirri góðu uppbyggingu sem verið hefur hjá Bæjarvík og jafnframt endurbæta stöðina og auka framleiðslugetu hennar til seiðaeldis. Arnarlax bindur miklar vonir við þá uppbyggingu sem framundan er í Tálknafirði ásamt uppbyggingu sem framundan er á Bíldudal. Gert er ráð fyrir að fyrstu seiði frá Bæjarvík fari í sjó vorið 2014.