Margir vilja láta greina gamla gripi.

Dagskráin hefst kl. 14 og lýkur kl. 16 og samkvæmt fenginni reynslu næst að greina um 50 gripi á þeim tíma. Fólki er því bent á að koma tímanlega og taka númer.

Þetta er í tíunda skipti sem safnið býður fólki að koma með gripi til greiningar, en þessir greiningardagar safnsins hafa verið mjög vel sóttir og margt skemmtilegt komið þar í ljós. Dagarnir eru ekki bara fróðlegir fyrir þá gesti sem koma með gripi, heldur gefst starfsfólki safnsins einnig einstakt tækifæri til að sjá þá mörgu áhugaverðu og skemmtilegu gripi sem til eru á heimilum landsmanna.

Tekið skal fram að einungis verður reynt að greina muni með tilliti til aldurs, efnis, uppruna o.s.frv. en starfsmenn safna meta ekki verðgildi gamalla gripa. Eigendur taka að sjálfsögðu gripina með sér aftur að lokinni skoðun.