Vestfjarðavegur nr. 60. Verður áfram ekið eftir hlykkjóttum og bröttum fjallvegum?

Forsvarsmenn sveitarfélaganna Vesturbyggðar, Tálknafjarðar og Reykhólahrepps hafa á opinberan hátt ítrekað að finna þurfi nýja láglendisleið sem sátt er um. Í auglýsingu sem birt er í dag í Fréttablaðinu og Morgunblaðinu segir að treyst sé á stuðning þingmanna úr öllum kjördæmum í þessu mikilvæga byggða- og samfélagsmáli. „Vegamál á sunnanverðum Vestfjörðum eru í ólestri og hafa verið árum saman. Áralöng bið eftir láglendisvegi um Barðastrandasýslu er í uppnámi. Ef heldur áfram sem horfið blasir við áframhaldandi akstur um erfiða, oft illfæra og hættulega fjallvegi næstu áratugi. Þetta er óásættanlegt,“ segir í auglýsingunni.

Þar eru lesendur beðnir að hafa í hug að greiðfær og öruggur láglendisvegur um Barðastrandasýslu sé nauðsynlegur til að stuðla að áframhaldandi byggð og framþróun í samfélags- og atvinnumálum á sunnanverðum Vestfjörðum.

Samkvæmt tillögum innanríkisráðherra á að endurbyggja erfiða hálendisvegi um Hjallaháls og Ódrjúgsháls en sveitarstjórarnir þrír telja tillöguna fela í sér sóun á almannafé. „Tillaga ráðherra felur ekki í sér ásættanlegar vegabætur. Vegstæðið verður áfram í sömu hæð og nú. Áfram verður ekið eftir hlykkjóttum og bröttum fjallvegum yfir erfiða hálsa. Fyrningatími þjóðvega er að lágmarki 25 ár. Því er ljóst að tillögu ráðherra koma í veg fyrir láglendisveg á þessu svæði næstu áratugi,“ segir í auglýsingunni og þar er bætt við. „Láglendisvegur er eina lausnin í samgöngumálum svæðisins og hefja þarf vinnu við hann sem allra fyrst, ef byggð á ekki að leggjast af á sunnanverðum Vestfjörðum. Þetta mál þoli ekki bið.“ 

        frétt tekin af: bb.is