Ólafur Þór Ólafsson

Sveitarstjórn Tálknafjarðarhrepps samþykkti í gær að ráða Ólaf Þór Ólafsson sem sveitarstjóra. Hann mun koma til starfa í lok mars og er ráðinn til loka núverandi kjörtímabils eða út júní 2022.
 
Ólafur Þór er 47 ára stjórnsýslufræðingur, kennari og tónlistarmaður sem á ættir að rekja til sunnanverðra Vestfjarða. Hann er með áralanga og fjölbreytta reynslu af starfi og stjórnsýslu sveitarfélaga, var fyrst kjörinn bæjarfulltrúi í Sandgerðisbæ árið 2002 og var forseti bæjarstjórnar þess sveitarfélags 2010 til 2018. Hann hefur setið í stjórn Sambands sveitarfélaga á Suðurnesjum, var formaður þess um tíma og hefur verið formaður Svæðisskipulagsnefndar Suðurnesja frá upphafi. Frá árinu 2018 hefur hann verið formaður bæjarráðs Suðurnesjabæjar. Ólafur Þór átti um tíma sæti í stjórn Isavia og situr nú í stjórn Atvinnuþróunarfélags Keflavíkurflugvallar, Kadeco. Að auki hefur hann komið að ýmsum trúnaðarstörfum í samstarfi sveitarfélaga bæði á lands- og svæðisvísu. Þá hefur hann starfað sem stjórnandi hjá Sandgerðisbæ, Hafnarfjarðarbæ og Sveitarfélaginu Vogum og var í nokkur ár forstöðumaður Fjölsmiðjunnar á Suðurnesjum. Ólafur Þór mun láta af trúnaðarstörfum á vegum Suðurnesjabæjar þegar hann kemur til starfa á Tálknafirði.
 
Sveitarstjórn Tálknafjarðarhrepps lýsir yfir ánægju með að fá svo reyndan sveitarstjórnarmann til liðs við sig og væntir mikils af störfum Ólafs Þórs.

 

Veðrið verður vont á morgun og verður slæmt strax snemma í nótt, hér er áætlun um hugsanlegar lokanir vega í nótt og á morgun, vegir sem eru á óvissustigi hjá okkur í Vegagerðinni. Ákvörðun um lokanir eru svo teknar allt eftir því hvernig veðrið gengur yfir, ekki víst að komi allsstaðar til lokunar og heldur ekki nákvæmlega hvort það verði þessar tímasetningar. Þetta eru viðmiðanir. Ljóst er samt miðað við veðurspána að það kemur örugglega til einhverra lokana.

Sjá nánar á vegagerdin.is

Hefst 17. febrúar 2019.

Námskeiðið er fyrir byrjendur og er fyrri hluti af stigi 1 samkvæmt námskrá frá Menntamálaráðuneytinu.

Farið er í stafrófið og framburð. Grunnorðaforði, úr daglegu lífi, er æfður með mjög einföldum setningum. Nemendur læra að segja svolítið frá sér, að spyrja einfaldra spurninga og að skilja mjög létta texta.

Kennari: Helga Gísladóttir.
Tími: Hefst mánudaginn 17. febrúar 2020 kl. 19:00. Kennslufyrirkomulag verður kynnt í fyrsta tímanum.
Lengd: 30 kennslustundir (10 skipti).
Staður: Patreksskóli.
Verð: 27.000. kr.

Almennt gildir að til þess að ljúka námskeiði hjá Fræðslumiðstöð Vestfjarða með viðurkenningu þarf að lágmarki 75% mætingu

552. fundur hreppsnefndar Tálknafjarðarhrepps verður haldinn að Strandgötu 38,
13. febrúar 2020 og hefst kl. 18:00.

Sjá fundarboð hér (.pdf)

 
Bjarnveig Guðbrandsdóttir, oddviti

Í Tálknafjarðarskóla hefur nú verið tekið upp á þeirri nýjung að bjóða uppá starfsnám á unglingastigi á vorönn. Starfsnámið fellur undir valgreinar en nemendur hafa til þess tvær klst á hverjum miðvikudegi út vorönn í skipulagt starfsnám. Hugmyndin kviknaði eftir góðan og innihaldsríkan samráðsfund sem skólastjóri kallaði til undir heitinu Óskaskólinn okkar.  Á þeim fundi var kallað eftir hugmyndum bæjarbúa Tálknafjarðar um skólalóðina, sérstök verkefni og tengingu við atvinnulífið. Í kjölfar fundarins leitaði skólastjóri til fyrirtækja á Tálknafirði um hvort það væri áhugi og vilji til þess að taka við starfsnámsnemum frá grunnskólanum á vorönn 2020. Níu fyrirtæki urðu við þeirri beiðni og voru spennt að taka við starfsnámsnemunum, þau fyrirtæki sem urðu við beiðni okkar voru TV-Verk, Hópið, Allt í járnum, Leikskóladeild Tálknafjarðarskóla, Tungusilungur, Sjótækni, Íþróttamiðstöð Tálknafjarðar, Bæjarvík og Hjá Jóhönnu.
 
Nemendur völdu sex fyrirtæki sem þau höfðu áhuga á að kynnast nánar og eru nú búin með fyrstu vikuna á vettvangi en þau fá þrjár vikur hjá hverju fyrirtæki sem þau völdu. Allir nemendur fóru mjög spenntir á vettvang og hlakka til komandi vikna. Við þökkum fyrirtækjunum fyrir að taka vel á móti okkur og að taka þátt í verkefninu. Þetta verður vonandi að verkefni sem kemur til með að vera.

Sjá nánar á heimasíðu Tálknafjarðarskóla.

Farþegar og flutningsaðilar athugið ferjan Baldur mun sigla aukaferð á sunnudag 9. febrúar brottför kl. 9:00 frá Stykkishólmi og brottför kl. 12:00 frá Brjánslæk.
 
Seinni ferð dagsins verður skv. áætlun, brottför frá Stykkishólmi kl. 15:00 og frá Brjánslækjarhöfn kl. 18:00.
...