Eigendur og ábyrgðarfólk báta og skipa sem liggja í Tálknafjarðarhöfn eru beðnir um að huga að fleyjum sínum og landfestum. Samkvæmt spám þá bætir verulega í vind þegar líður á sunnudagskvöld og gefin hefur verið út gul og svo appelsínugul veðurviðvörun sem gildir mánudagsmorguninn 7. febrúar.
Hafnarstjóri
Boðað er til 586. fundar sveitarstjórnar Tálknafjarðarhrepps þriðjudaginn 8. febrúar 2022 sem fer fram á skrifstofu sveitarfélagsins að Strandgötu 38 og hefst kl. 18.00.
Sjá fundarboð hér (.pdf)
Ólafur Þór Ólafsson, sveitarstjóri
Samráðsnefnd Vesturbyggðar og Tálknafjarðarhrepps gerði eftirfarandi ályktun á fundi sínum sem fór fram 2. febrúar 2022:
Á sama tíma og Vestfirðir eru auglýstir sem einn af eftirsóknarverðustu áfangastöðum heimsins sumarið 2022, þá eru samgönguinnviðir á sunnanverðum Vestfjörðum ónýtir og að helstu náttúruperlum Vestfjarða, eins og Látrabjargi og Rauðasandi, liggja úr sér gengnir malarvegir. Samráðsnefnd leggur áherslu á að við endurskoðun samgönguáætlunar verði samgönguinnviðir á sunnanverðum Vestfjörðum bættir en svæðið hefur setið á hakanum um áratugaskeið þegar kemur að vegaframkvæmdum. Þrátt fyrir að framlög til vegaframkvæmda á Vestfjörðum í heild sinni hafi aukist þá hafa sunnanverðir Vestfirðir setið eftir og með þeim miklu umsvifum sem nú hafa orðið í atvinnulífi á svæðinu og mikilli fjölgun íbúa eru margir vegkaflar á svæðinu óboðlegir allt árið um kring, m.a. vegna viðhaldsskorts og skorti á framlögum til vetrarþjónustu. Sem dæmi um þá alvarlegu stöðu sem nú er á samgönguinnviðum á sunnanverðum Vestfjörðum þá er vegurinn um Mikladal ónýtur, vegurinn siginn og vegaxlir illa farnar. Þá hafa síðustu 3 mánuði orðið fjórar bílveltur á veginum um Mikladal, en vegakaflinn er fjölfarnasti vegur á Vestfjörðum. Mikilvægt er því að tryggja viðunandi framlög til viðhalds og þjónustu ásamt því að framlag verði veitt til að hefja án tafar rannsóknir og undirbúning vegna jarðgangagerðar undir Mikladal og Hálfdán.
Einnig verði í samgönguáætlun mælt fyrir um verulega aukin framlög til Vegagerðarinnar til að sinna nauðsynlegri vetrarþjónustu og lengja þjónustutíma til að bregðast við aukinn umferð m.a. þungaflutninga sem og að tryggja vetrarþjónustuna á þeim leiðum sem framkvæmdir standa nú yfir á, s.s. á Dynjandisheiði. Þá verði gert ráð fyrir framlagi til endurnýjunar ferjunnar Baldurs sem siglir um Breiðafjörð og þar með tryggt öryggi farþega sem og greiðar samgöngur frá og til sunnanverðra Vestfjarða allt árið um kring.
Þá verði framkvæmdum m.a. við Bíldudalsveg af Dynjandisheiði og ofan í Arnarfjörð flýtt og þar tryggð vetrarþjónusta. Einnig verði veitt framlag í að bæta vegkafla frá Bíldudalsflugvelli og að þorpinu á Bíldudal, en vegurinn er ónýtur, vegaxlir illa farnar og vegurinn einbreiður. Þá verði áfram hugað að viðhaldi Bíldudalsflugvallar og veitt framlag til að bæta aðflug m.a. í myrkri vegna sjúkraflugs. Samráðsnefnd leggur einnig áherslu á að tryggð verði framlög í hafnarbótasjóð til að standa undir nauðsynlegum framkvæmdum við hafnarmannvirki sveitarfélaganna, m.a. til að bregðast við aukinni atvinnustarfsemi í höfnum sveitarfélaganna tveggja sem tilkomin eru vegna aukinna umsvifa í fiskeldi og tengdum atvinnugreinum.
Vegna óviðráðanlegra atvika þá er sorphirða stopul dagana 17.-26. janúar í Vesturbyggð og á Tálknafirði.
Covid hefur bankað upp á hjá starfsmönnum og ekki hægt að anna öllum verkum. Þá er aðeins einn starfsmaður að störfum sem er nýbyrjaður og ekki er hægt að ætlast til að hann geti haldið uppi sömu þjónustu og vanir menn. Vonast er til að ástandið lagist upp úr miðri næstu viku og hægt verði að vinna allt upp á næstu tveimur vikum. Beðist er velvirðingar á þeim óþægindum sem þetta kann að valda og eru íbúar beðnir um að sýna biðlund á meðan þessi veikindi klárast.
Vegna slæmrar veðurspár og mikil ölduhæð á morgun, föstudaginn 21. Janúar, þá verður stefnt á að sigla í fyrramálið kl. 6.00 frá Stykkishólmi og 9:00 frá Brjánslæk í staðinn fyrir 9.00 og 12.00 ferðina.
Seinni ferðin á morgun er hér með aflýst vegna veðurs.
Boðað er til 585. fundar sveitarstjórnar Tálknafjarðarhrepps sem er aukafundur og er boðað til hans í samræmi við samþykktir sveitarfélagsins.
Fundurinn fer fram á skrifstofu sveitarfélagsins að Strandgötu 38, fimmtudaginn 20. janúar 2022 og hefst hann kl. 18:00.
Sjá fundarboð hér (.pdf)
Ólafur Þór Ólafsson, sveitarstjóri
