Vegna veðurs fellur ferð ferjunnar Baldurs niður í dag, 12.janúar.

https://www.saeferdir.is/

Háskóli Íslands stendur í vetur fyrir nýsköpunarhraðli fyrir konur undir merkjum AWE eða Academy for Woman Entrepreneurs í samvinnu við bandaríska sendiráðið á Íslandi. Þetta er í annað sinn sem hraðallinn er haldinn.

Aldrei hefur verið mikilvægara en nú að fjölga sprotum og efla nýsköpun í íslensku efnahagslífi og að sama skapi auka hlut kvenna á þeim vettvangi. Markmið hraðalsins er að efla konur til að þróa áfram sínar viðskiptahugmyndir, bjóða upp á fræðslu og efla tengslanetið.

Verkefnið er á vegum bandarískra stjórnvalda og er í boði víða um heim. Það samanstendur af netnámskeiðinu Dreambuilder á vegum Thunderbird School of Managament við Ríkisháskólann í Arizona og vinnulotum sem Háskóli Íslands heldur utan um. Ein staðlota verður haldin fyrir norðan í samvinnu við Háskólann á Akureyri. 

Einstaklingar sem skilgreina sig sem konur og á öllum aldri geta sótt um að taka þátt í hraðlinum og verða 40-50 umsækjendur valdir til þátttöku. Hægt er að sækja um sem einstaklingur eða lið.

Æskilegt er að umsækjendur hafi viðskiptahugmynd sem þróuð verði í gegnum námskeiðið eða hafi nýlega stofnað fyrirtæki sem hefur gagn af því að fara í gegnum hraðalinn. 

Þær konur sem verða valdar til þátttöku skuldbinda sig til að fara í gegnum efni netnámskeiðsins og taka þátt í vinnulotum.

Opið er fyrir umsóknir fram til 17. janúar 2022 og er hægt að fá nánari upplýsingar á vefsíðunni www.awe.hi.is

Boðað er til 584. fundar sveitarstjórnar Tálknafjarðarhrepps sem fer fram á skrifstofu sveitarfélagsins að Strandgötu 38, fimmtudaginn 13. janúar 2022 og hefst kl. 18:00.

Sjá fundarboð hér (.pdf)

Ólafur Þór Ólafsson, sveitarstjóri

Síðustu daga hafa 19 einstaklingar greinst með covid-19 á Patreksfirði, þar af greindust 8 smit í dag, en flest þeirra voru innan sóttkvíar. Vettvangsstjórn almannavarna á sunnanverðum Vestfjörðum hefur fundað yfir helgina vegna fjölgunar smita, en smitin teygja sig inn í leik- og grunnskóla á Patreksfirði. Að þessu sinni hafa staðfest smit ekki komið upp á Tálknafirði og því er skólastarf Tálknafjarðarskóla og önnur starfsemi sveitarfélagsins áfram með eðlilegum hætti.

Næstu daga hvetjum við íbúa til að fara sérstaklega varlega og draga úr öllu samneyti nema brýna nauðsyn beri til. Þeir aðilar sem hyggjast standa fyrir viðburðum eru hvattir til að fresta þeim í að minnsta kosti um viku. Ef minnstu einkenna verður vart, eru íbúar hvattir til að skrá sig í sýnatöku og ekki mæta til vinnu eða í skóla og fara varlega, þar sem veiran er sérstaklega smitandi.

Fylgst verður áfram vel með þróun smita næstu daga og brugðist skjótt við í starfsemi sveitarfélagsins ef þörf krefur.

Gætum að sóttvörnum, mætum í sýnatöku ef einkenna verður vart og saman komumst við í gegnum þetta.

Ólafur Þór Ólafsson

sveitarstjóri

Þorrablótsnefnd hefur fundað á ný.
  Vegna þess hve Covid takmarkanir eru gleðisnauðar og drepandi leiðinlegar eru ekki neinar forsendur að boða til mannfagnaðar á næstu vikum. Nefndin getur ekki ábyrgst að gestir missi sig ekki í trylltum dansi og blautum kossum. Okkar sívinsæla þorrablóti hefur því verið frestað fram á næsta ár, enn og aftur.
 
  Vegna forfalla formanns á næsta ári, hefur Bjarni Jónsson tekið að sér formannsstarfið.
  Til að bæta upp þann sára missi, mun tvífari hans Valdimar Hermann Hannesson starfa með nefndinni.
 
   Nefndin