Félagsstarfið í Vinheimum hefst á ný eftir sumarleyfi mánudaginn 30. ágúst n.k. kl. 13:00. Starfsemi í Vindheimum verður með svipuðum hætti og undanfarin ár, en þó má búsast við að nokkrar nýjungar verði prófaðar. Dagskrá vetrarins verður betur kynnt síðar.
Nýr starfsmaður er Jóna Sigursveinsdóttir og er hún boðin hjartanlega velkomin til starfa.
Það þarf að gera tímabundnar breytingar á opnunartíma Íþróttamiðstöðvar Tálknafjarðar næstu daga.
Á virkum dögum verður lokað milli kl. 12:00 og 15:00 og gildir það frá og með mánudeginum 23. ágúst og til þriðjudagsins 31. ágúst.
Þessa daga verður því opið á virkum dögum frá kl. 08:00 til 12:00 og kl. 15:00 til 20:00
og á laugardögum og sunnudögum kl. 11:00 til 14:00.
Guðný Lilja Pálsdóttir hefur hafið störf sem Íþrótta og tómstundafulltrúi á sunnanverðum Vestfjörðum. Íþrótta- og tómstundafulltrúi er sameiginlegur starfsmaður Tálknafjarðarhrepps, Vesturbyggðar og Héraðssambandsins Hrafna-Flóka.
Guðný Lilja, sem er menntaður tómstunda og félagsmálafræðingur, er boðin velkomin til starfa.
Boðað er til 576. fundar sveitarstjórnar Tálknafjarðarhrepps sem fer fram á skrifstofu sveitarfélagsins að Strandgötu 38, Tálknafirði, miðvikudaginn 18. ágúst og hefst hann kl. 18:00.
Um er að ræða aukafund sem er boðaður í samræmi við samþykktir sveitarfélagsins.
Sjá fundarboð hér (.pdf)
Ólafur Þór Ólafsson, sveitarstjóri
Á 575. fundi sveitarstjórnar Tálknafjarðarhrepps sem fór fram 12. ágúst var lögð fram auglýsing frá Fiskeldissjóði þar sem óskað er eftir umsóknum vegna ársins 2021. Sveitarstjórn samþykkti að fela sveitarstjóra að sækja um styrk til sjóðsins vegna hafnarframkvæmda. Jafnframt gerði sveitarstjórn eftirfarandi bókun í málinu.
Sveitarstjórn Tálknafjarðarhrepps er vonsvikin að þurfa að sækja um framlag úr sjóði sem er fjármagnaður með opinberum gjöldum greiddum af starfsemi er fer fram við strendur sveitarfélagsins. Sjóðurinn úthlutar til verkefna sem snúa að styrkari samfélagsgerð; uppbyggingu innviða; vinnu að loftslagsmarkmiðum og umhverfisvernd t.d. í fráveitum; vegna uppbyggingar aðstöðu í landi og til nýsköpunar. Öll þessi atriði eru verkefni sem sveitarfélög sinna nú þegar og því væri rétt að opinbert fjármagn sem verður til vegna starfsemi fiskeldisfyrirtækja renni beint til viðkomandi sveitarfélaga. Þetta nýja fyrirkomulag skapar óþarfa spennu milli sveitarfélaga, kallar á aukna vinnu og kostnað og getur verið þungur baggi fyrir lítil sveitarfélög. Það hlýtur að vera hægt að treysta sveitarfélögunum til að fara með það opinbera fé sem er ætlað til uppbyggingar fiskeldissamfélaga í stað þess að þau séu neydd í betliferðir til Reykjavíkur eftir fjármagni. Það getur ekki talist hagkvæmasta leiðin til að fara með opinbert fé.
Næsta laugardag, 14. ágúst, er stefnt að því að bera á tréverkið á Tálknafjarðarkirkju. Óskað er eftir sjálfboðaliðum til að hjálpa við þetta þarfa og um leið skemmtilega verkefni. Hafist verður handa kl. 10:00 á laugardagsmorgun. Efni og verkfæri verða á staðnum og þarf fólk bara að mæta við kirkjuna í málningarfötum. Margar hendur vinna létt verk.
Sóknarnefndin
